كان نفسي يا آبا
كان نفسي يا آبا
أشبع من حنان قربك
كان نفسي أهرب
من عذابي
أترمي ف حضنك
كان نفسي أحس
معنى بابا
وأنا ماشي جنبك
وطريق حكايتي
وأكون كضلك
فتحت عيني
على الحياة
قالولي مات
وماعاد فاضلك
غير الدموع ويا الآلام
ياصغر سنك
عشت الحياه
وقلبي خالي من الأمان
محتاج أضمك
دورت ياما على الأمان
ما اعرفش إنك
كنت الحياه
كنت الأمان
ليه سبت إبنك
وسط الحياة
محتاج إليك
محتاج يقولك
عن اللي بيه
وعن اللي كان
محتاجه منك
كان نفسه يجري
من الهموم
يتدارى عندك
بين الهدوم بين الضلوع
لأ جوه قلبك
كان نفسي يا آبا
أرتمي مابين ايديك
أبكي وأقولك
إني تعبت من الحياه
ومحتاج أروحلك
وأبعد بعيد عن الحياه
اللي ماتسوى
حضن منك
موتك دا موتي
ياللي خيالي
عايش حكايتك
محتاج إليك
وتعبت بعدك
أنا مش لاقيك
وأنا حته منك
قلبي انفطر
محتاج إليك
محتاج يضمك
كان نفسي يا آبا
أحس بيك
واسمعها منك
كلمة ضنايا
وانا أقول يا أبويا
أنا كلي ملكك
بقلم الشاعر/ فهمي محمود حجازي
